AFFORESTATION

Lalthanmawia Ralte
 Core Faculty (Eco),
SIRD, Mizoram.

 

Afforestation chu enge ni?

Afforestation chu ramngaw la awm lohna hmunah thing tiak phun atangin emaw a chi atang emaw a ramngaw siam hi a ni. Afforestation hi Reforestation nen ngaih pawlh a ni fo thin. Reforestation chuan ramngaw lo awm tawh thin, amaherawhchu chereu tawh siam that leh nana thingphun hi a kawk a ni.Ramngaw siam nana thingphun ve ve an ni chungin Reforestation chu hun la rei vak lova ramngaw ni thin, amaherawhchu tuna awm ta lo siam that leh hi a ni a, Afforestation chu hun rei tak atanga lo awm tawh lo emaw a la awm ngai miah lohna hmun emaw a ramngaw siam hi a ni. Reforestation chu ramngaw awmsa a thing phun belh a nih laiin Afforestation chu ramngaw thar siam a ni. Intergovernmental Panel on Climate Change (IPCC) guideline chuan Afforestation chu ‘hriat phak chin a ramngaw la awm ngai lohna hmuna ramngaw siam’ tiin a sawifiah a ni.

A ngaih nachhan:

Mihringte hian kan leilung hausakna hi ren lo takin kan hmang a, ramngaw kan ti chereu in thing kan kit vak vak a, boruak, leilung leh tui kan tibawlhhlawh bawk a. Hei hian kan chenna khawvelah chhiatna kumhlun thlenin boruak lum tulh tulhna leh sik leh sa inthlak danglamna nasa tak a thlen a ni. Kan khawvel leh a chhunga chengte damrei nan kan leilung hausakna tihpun leh heng kan hausakna ren lo taka kan hman thin tih tawp hi a tul a ni. thing phun leh ramngaw siam hian eizawnna atana mihring ten kan mamawh tam tak a phuhru in kan ramngaw neihsa la bang te ti chereu lo turin a pui bawk a ni. Chuvang chuan ram hrang hranga sorkar leh pawl dangten Afforestation hi kan leilung hausakna renchem nan leh uchuaka hman tihtawp nan a rawt a ni.

Khawvelah mihring kan lo pungin kan thing mamawh pawh a kum telin a lo pung zel a, chu chuan kan ngaw neihsa te chu a lo ti chereu ta zel a; hei vang hian ramngaw siam thar a lo ngai ta a. Ramngaw siam chawp afforestation tihna tur hmun hi uluk taka thlan a ngai a. Hei hi kan ramngaw neihsa tibuai lo thei ang bera duan a pawimawh hle. Khuarel ramngaw kan neihah te hian nungcha leh ramhmul damdawi lam chi tam tak a inphum a; hengte hi kan sum duh luat avanga hma lam hun thlir lo leka kan tih chereu mai hi a hlauhawm hle. Ramngaw awm tawh lohna hmuna ngaw siam thar leh hi thil tul leh tih makmawh a ni a; kan ramngaw awmsa ven himna atan pawha thil tul tak a ni reng a ni. 

Thing phun leh ngaw siam te hi leilung venna leh tui hna vawn himna tangkai tak a ni. Thingkung chuan ruah sur leh thli lakah kan leilung hi a chhanhim thin a; ruah a lo surin ruahtui chu thing hnahah a tla a, na taka ruah mal farin a rawn denna tha chu a lo ti nep a; zawitein leiah a far thla ta thin a, a then chuan thingkung zawhin zawimuangin thingkung bulah a put thla ta thin a. Lei chung langa thing hnah leh zar tla tawih tawh (lei dur) te chuan tui chu an lo hip khawl a, chung tui mal te chu zawi zawiin lei chhungah put lutin, a thlang lam ram hniam lamah tui hna thianghlim a lo siam ta thin a, fur reh hnuah pawh tui hna a la awm thei thin a ni. Kan leilung hi engmahin a khuh loh chuan a hnawnna (moisture) chu tuihuah a kal ral chak em em a; lei a ro a, thli leh ruah pawhin awlsam takin a len darh mai thei thin a ni. Lei lawng chu ruah fangin a lo nan chuan na takin a zu deng a, lei mur te te chu a per sawn thin a, tui hawkin a len bo mai thin. Chutiang hmun
chu hun rei lo te chhungin lei char takah a chang mai thin a. Tui pawh a pai tam thei thin lo. Tui pawh a put lut tha thei thin lova, tui hawk siamin lei a hawrh khuar a; kawrte a siam leh a, lei min pawh a thlen thin. Khua reiah phei chuan leilung te luang ralin, lung khawkrawk mai a hnutchhiah thin a ni.

Afforesation thil tum:

Afforestation chuan khawvelin harsatna kan tawh mek, a bik takin boruak lum chho zel tur vente, boruak lum chho in a nghawng siam thatte, ram hman tlak loha siam tihbo te a ni.

 

Ramngaw pawimawhna:

  • Thingzai leh ramngaw kaihhnawih tharchhuahah khawvel mamawh a phuhru: Tunlai khawvelah kan ei leh bar zawnna leh ramngaw hi inngheng tlat an nih avangin nga eizawnna atan chuan hman char char a remchang lo a ni. Ram ruak leh ram ngaw awm lohna hmuna thing phun hian thing leh a kaihhnawih chi hrang hranga eizawnna a pui thei a. Khuanu duansa ramngawte ti chereu lovin Afforestation hmang hian tuah thing leh insakna atana thing mamawh pung zel hi kan phuhru thei dawn a ni.
  • Lei chung hang luang ral tur a veng: Thing zungte hian leilung nghet takin an phuar khawm a, tin, thing hnah hian ruah tuiin na taka lei a deng tur veng bawk a, hei vang hian ruah tuiin lei chung hang leh leitha a luan ral pui tur hi a veng thei a ni.
  • Zin mite a hip: Ramngaw tha leh ramngaw tamna ram hi mi tam takin tlawh an chak thin a. Chuvang chuan ramngaw hian zin mite a hip khawm a ni.
  • Eizawnna petu: Nungcha tin reng leh mihringte hian kan chaw hmuhna leh kan chakkhai lakna chu ram-ngaw hi a ni a; sumdawnna thil tam tak pawh ramngaw atanga kan hmuh a ni. Ramngaw atang hian thing, thei rah leh damdawi chi hrang hrang, paper siamna hmanrua, thalhrit chenin kan hmu thei. Lei chhungril hausakna – tuialhthei leh lungalhthei te pawh hi kum sang tam tak liam ta a thing leh mau tawih ral tawh atanga lo insiam a ni.
  • Nungcha venna leh humhalhna a ni: Ramngaw hi nungcha tinrengte tana chenna hmun nuam tak leh inhumhimna a ni. Nungcha leh thlai te khuarel anga an inrintawnna hmun a ni.
  • Boruak tha a siam: Mihringte leh nungchaten a lova kan awm theih loh chu boruak thianghlim hi a ni. thing hnahte hian kan hip tur boruak thianghlim min pe a ni.
  • Tuihna Siamtu: Ramngaw te hian ruahtui an lo hipin, lei dur leh thingzung te chuan tui hna an chelh rei thin. Hei hian tuihna a ti pung.
  • Sik leh Sa nuam siamtu: Ramngaw hian sik leh sa nuam min pe a. Tuihna a lo chelh mai bakah, boruak hnawnna vawng himtu a ni a, mihring ten kan industry leh thil dang atanga boruak chhia tinreng kan tih chhuah te chu a lo hip ral thin a, Carbon Dioxide (CO2) kan thawk chhuah chu lo hipin, Oxygen (O2) min pe thin a ni. Khawvel lo lum chak lutuk vengtu ropui tak a ni.
  • Ram hmelhmang mawina a vawng tha: Ramngaw hian ram a ti mawiin thlir a tinuam a, a hmelhmang mawina vawng thatu a ni.

 

Ramngaw tichhe tute:

  • Loneih leh a kaihhnawih: Eitur mamawhna a pun zel avangin huan leh lo atan te, ran tlatna hmun atan te ngaw tam tak thiah a ni thin.
  • Thing zai leh a kaihhnawih atana thing kih: Hmanraw hrang hrang atana kan thing lakte, tuah thing leh meihawl atana kan hmante hian ramngaw a ti chereu chak hle.
  • Hmasawnna leh changkanna: Mipui kan pun zel avanga khua dinna te, chenna In sakna leh khawpui thang zel avanga a zauhna te, industry hmun te, kawngpui siamna atan te hian ramngaw kan thiat thin.
  • Hmantlak loha ram siamna: Thil siamna hmunpui atanga a thli chhia luang chhuakte hian thlai leh thing to theih lohna turin ram a tichhe thei a ni.
  • Lei chhungril hausakna: Tuialhthei leh lungalhthei laihchhuahna hmun te hian ram zau tak an mamawh in ramngaw zau tak thiah a ni thin a. Hemi piah lamah hian heng hmun panna tura kawngpui siam nan ramngaw tihchhiat a ni thin bawk.
  • Ram kang: Khawvel hmun hrang hrangah kangmei avangin ramngaw eng emaw zah a chhiat phah a, thing tam tal a kang hlum thin a ni.

CLICK TO DOWNLOAD