BAWNG VULH HLAWK DAN

Dr. Lalrhuaitluangi Sialo
Core Faculty (Vety)
SIRD, Mizoram

 

BAWNG CHUNGCHANGA HRIAT TUR PAWIMAWHTE

  1. Taksa lum zawng       :     5 (100 – 102.8)
  2. Marphu ran lam       :     70 (40 – 100) per minute
  3. Thawk ran lam       :     31(27 – 40) per minute
  4. Hur hun hmasaber       :     12 – 18 months
  5. Bawngpa chi thlah theih hun       :     2 – 3 years
  6. Bawngnu hur rei lam       :     12 – 18 hours
  7. Bawngnu hur zin lam       :     Ni 21 (18 – 24) danah
  8. Bawngpui no neih hnua a hur leh hun : 41 – 60 days hnuah
  9. Bawngpui no pai rei zawng       :     281 (274 – 291)
  10. Bawngpui pawltir hun       :     A hur tawp lamah

 

BAWNG VULHNA HMUN THLAN

A hmasa berin Bawng vulh tur chuan a vulhna hmun tur a thlan fuh a pawimawh. Hei hian ran hriselna a keng tel a, Bawng Farm atanga hlawkna hmu chhuak tak tak turin a pawimawh hle. Heng a hnuaia mite hi Bawng vulhna hmun thlan kawngah chhinchhiah nise:

  1. Khawchhung atanga hla lutuk lo leh mihring chenna khaw pawn ni si ni thei se. Hei hian kal velna (transportation) senso a titlem thei thin a, mihring tan bengchheng leh rimchhia a siam lova, ran tan harsatna a pumpelh bawk.
  2. Kawlphetha lak mai theihna nise.
  3. Tui thianghlim hnianghnar taka hmuh theihna hmun a ni thei ngei tur a ni. Ran in tur, a in leh a vel tihfaina turin tui mamawh a tam avangin hei hi thil pawimawh tak a ni.
  4. A hmun a rualremin a thengthaw nuam tur a ni a, a tul huna farm tihlen zel a remchang bawk tur a ni. A theih chuan ran chaw chi fodder china hmun remchang awm bawk se a tha.
  5. Hmun rualrem a nih rualin ran ek leh zun paihfai awlsam, a luanral theihna hmun a ni tur a ni.
  6. Lirthei (motor) luh theih kawng siam remchang, motor kawng atanga hla lo hmun ni thei se a tha.
  7. BAWNG IN SAK (HOUSING)

 

Khaw lum, ni sa lutuk emaw, vawt lutuk leh ruah/vur atangte a tawm hulna in sak chu thil pawimawh tak a ni. Bawng vulhte tan ran in chu a nuam tur a ni. Ramsa hlauhawm lak atangin himna a ni bawk tur a ni. Heng bakah hian natna lak atanga Bawng an lo fihlim zawk nan ran in hi tihfai leh damdawi hmanga tihfai (disinfect) awlsam zawnga ruahman a tha. Ran zun leh ek atanga boruak rimchhia leh natna hrik lo inthlahpung thei laka fihlim a pawimawh, boruak thianghlim ran in chhungah a tam tawk tur a ni a, Ni zung (ultra violet ray) pawh ran in chhungah a lut thei tur a ni. A bik takin ran zun leh ek luan ralna/paihna ni zung chhun theiha siam a pawimawh hle a. Ran in chu chhim leh hmar hawlh zawnga sak a nih chuan ni zung a dawng tha nge nge.

 

Bawng in chi hrang hrang sak theih a ni a, Conventional Barn – Cow House System hi Mizoram tan chuan a tha ber awm e. Dairy Cow (cross – breed) hi kan vulh nasat ber a ni a. Tual Bawng vulhten Loose Housing System hman a ni ber.

Chutichuan Bawng in sa tute chuan a hnuaia kan tarlan pawimawh zualte hi chhinchhiah a tha:-

  1. Boruak thianghlim tam tawk a lut thei tur a ni (proper ventilation)
  2. Tihfai leh tihthianghlim (disinfect) awlsam tur a ni.
  3. Ni zung a dawng tha tawk tur a ni.
  4. Ni sa/ khawlum lutuk leh ruah/khawvawt lutuk atangin ran an him tur a ni.
  5. Ramsa hlauhawm lak atangin an him tur a ni.
  6. Rukru lakah a him tur a ni.
  7. Bawng in chhunga Bawng tlar khat a awmin Bawng 10 (sawm) a tawk a. Tlar hnih a nih chuan Bawng 16 – 20 vel in khatah a dah theih.
  8. Bawng in chhungah Bawng tlar hniha dah a nih chuan a mei lam inhawitawna tlar hi tha zawka ngaih a ni. Bawng hnung lamah a hmalam aiin hna atam zawk a (60% leh 15%), hun leh tha a heh lo zawka ngaih a ni. Tin, Bawngin boruak thianghlim an dawng tam thei zawk bawk.
  9. Khawlum leh vawt an tuar theih loh chin (an huat chin) critical temperature lo tarlang ila:-

 

  Low Critical Temperature Upper Critical Temperature
Bawng puitling

Bawng tuai/la

0°C

15°C

27°C (Holstein)

30°C (Jersey)

 

BAWNG IN

Bawngpui In/chhuat mamawh zau zawng hetiang hian lo tarlang i la:-

  1. A dinna/mutna :     4 – 5 ft. (Bawng sei  zawng a zirin)
  2. Bawng pakhat tana chhuat zau zawng :  4 ft.
  3. A chaw pekna (manger) vang lam          :           2 ft.
  4. A ek/zunna hmun vang lam                      :           2 ft.
  5. Enkawltu kal velna, a lu lam leh a

 mawng lamah                                                           :           2 ft. ve ve

Tichuan, tlar khata Bawng dahna chi (single row) tana Bawng in vanglam chu 16 – 17 ft. vel a ni. Bawng in liang hi a chhuat atanga 7½ ft. vel ni thei se a tha. A liang leh a tlung insan hleih dan lam chu 6½ ft. vel a ni ber. Hei hian ruahtui a paih tha tawk a ngaih a ni. A chhuat hi a awih tlan hret tur a ni a, 1 – 1 ½ ‘’ vela in awih hleihin a mawng lam a hniam ang. Bawngpui pakhat tan 65- 70 sq.ft. vel hi a chhuat zau zawng mamawh dan a ni ber. A chhuat chu nal lo, ro hma leh fai duh chi a ni tur a ni.

Tin, Bawng in chung atan chuan Asbestos emaw, Tile chi emaw a tha. Khawlum leh vawt lutuk tur Rangva lam aiin an veng tha a ni.

Chaw pekna (manger) chu chi hnih a awm thei a, a thuk zawng 1 – 4’’ leh 7’’, a khuhna (bang) ran hnaih lo lam san zawng chu 2 ½ – 3 ft. vel a ni ve ve. A ran dep lam khuhna a san deuh chuan ran chaw a darh sarh lo va, a hniam deuh chuan ran tan a nuam zawk thung.

BAWNG FARM – A IN SAK TUL DANGTE

  1. Calving Box: Bawngpui no neihna hmun tur 100 – 150 sq. ft – a zau, a note lo piana dah lumna tur buatsaihna a ni thin. A note awm lumna tur 2.5’’ vela chhahin buhpawl emaw, bedding lum chi a buatsaih a tha. Hei hi Bawngte leh a pui hrisel nan neih hran ngei a tha.
  2. Isolation Box: Ran damlo leh ran dah hranna in a ni a. Inkaichhawn awlsam chi natna neite tan 150 sq. ft. vela zau sak ngei a tha.
  3. Ran chaw dahna In (Feed Store): Ran chaw, a bikin Concentrate Mixture dah thatna tur neih hran a tha. Hnawng leh zuva lakah ran chaw him taka dah khawl theihna hmun buatsaih a pawimawh hle.

PAWN LAM LANDAN A|ANGA BAWNGPUI |HA THLAN DAN

  1. A taksa ruangam a sir zawnga enin hnung lam enin hnung lam lianin hma lamah a te phei zat tur a ni a. A lu a zo vah bawk tur a ni. A vun chu pangngai takin a pan tur a ni a, a fan theiin a nem thlap thin. A hmul a faiin a tle sang tur a ni a. Ria chum bat, tihrawl ngah leh thau hmuk a ni lo tur a ni.
  2. A lu chu taksa phu tawkah a lang sei te rat ang a, a nu riau tur a ni.
  3. A chal chu a pharh zau darh tur a ni.
  4. A Bawng breed avang a nih chauh loh chuan a hmai dung a ngil thla par tur a ni.
  5. A bengte chu pianze pangngai, len dan inang, han khawih vel pawha nem thlap leh harh hra a ni tur ani.
  6. A ki te chu len dan leh pian inang, to nghet tak an ni tur a ni.
  7. A dar pheng invuah a nghet tur a ni a, a ir pheng (brisket) a langsar tur a ni. A ke hmate chu ngil takin a dinpui thin tur a ni.
  8. A zang ruh chu a ngilin a lang chiang hle tur a ni a, a nakruhte pawh a awm lamah nalh takin a arh kual thin. A awm phei chu a zawl phei darh tur a ni a, a ngum bawr pawh a hlai hlap tur a ni.
  9. A khel vei lam leh ding lam chu inang leh intiat tak, inhlat deuhvin a invuah tur a ni a, a mei invuahna hnungzang bawr (rump) chu a hlai hlap ang a, a seiin a ngil parh thin. A khel ruh pir (pin bones) – te pawh a inhlat deuh dah tur a ni. A mei chu a sei thain a khawng lutuk lo bawk tur a ni. A bawp hnung lamte chu nalh takin a kual ang a.  Tihrawl chhah lutuk erawh a ni lo tur a ni. A khel bawr reng reng chu a lian bawr laih tur a ni.
  10. Bawngpui tha hriatna pawimawh tak chu a hnute bu hi a ni a, a lianin a fual hnak tur a ni a, mahse, a kap atanga uai fan satliah, inkhai fan mai a ni lo tur a ni. Han khawihin a nel nem thap a, a hnute bu chu inang tlang takin hmun li – ah a inthen hrang thliah ang.
  • A hnute hmurte chu te lo, mumal taka a hnute bu invuah, hma lam hawi deuhva invuah a ni tur a ni. A bawp ep hnute bute chu a vun chuar deuh tap khawpin a hnute bu a dawng hlawk a. Tin, a hnute bu invuahna hma lam, a dul vei lam leh ding lamah thisen zam lian tawk, mar teng tawng a lang ruah tur a ni. A hnute bu a thisen zam pawh a lian bik thin.

BAWNG HRISEL AWM DAN

Bawng din dan chu a nuamsamin a harhvang tur a ni.

  1. A kalin a ke chheh a zangkhai a.
  2. A lu a zovin thlek zawng bik a nei lo
  3. A ke a tul lovin a per sek tur a ni lo.
  4. A mei a ngil zar tur a ni.
  5. A hnar leh a hmui (muzzle) chu a vawtin a tlawrh hlap ang.
  6. Bawng vun dum chi a nih loh chuan a mucous membrane – te chu a sendang deuh anga, a dang lep tur a ni lo.
  7. A ki leh ke te a vawt lutuk tur a ni lova, a sa vur tur a ni hek lo.
  8. A chaw ei a tuiin, a taksa phu tawka tam a ei thin tur a ni.
  9. Nipui laiin a hmul a to tha chho hle ang a, thlasikah chuan a lo seiin a lo chhah tha hle ang.
  10. A vun chu a tihrawl chungah pawhfan theih a ni tur a ni.
  11. Bawng ek chu ruh lutuk lovin a nem deuh zawk thin.
  12. Darkar 6 – 8 danah a chaw a thial nawn ang a, hetih lai hian a vawi khat irh chhuah chu 30 – 75 seconds chhung vel zel a thial thin ang.
  13. A vawi khat irh chhuah hi vawi 30 – 35 vel a thial thin bawk.
  14. A thial nawn lai hian a khabe vei lam leh ding lam a insawih chhawk bawk tur a ni.
  15. A chaw (cud) thial nawn hi Bawng an bawh laiin a ni ber thin.
  16. Anmahni hmul leh an bul hnaia awmte hmul an liak mam peih fo tur a ni.
  17. An mu tho ding hi an zi mar ar ar thin.

BAWNG NOTE A LO PIANA ENKAWL DAN

  1. Bawng note a lo pian veleh a hnar leh ka bawra bawlhlawh awmte hrukfai vat hi thil pawimawh tak a ni.
  2. Kut faiin a mit leh taksa hmun dang har tuamtu awmte tihfai vat tur.
  3. A ka chhung hamda leh tawphnawk awm pawh/ kawm chhuah sak tur a ni.
  4. Bawng note laihrui a lo chah veleh Bawng note chu amahin a lo thaw chhuak zo lo thei a. Hetiang harsatna a awm hlauh a nih chuan ‘artificial respiration’ beih vat tur a ni.
  5. Bawng note piang hlim hlawl chu a puiin a ngaihsak lova, a liah fai/ ro mai loh chuan a tha lo va, hetiang a nih chuan Bawng note pang velah chi tlem phul emaw, atta dip phul emawin Bawngpuiin a ngaihsak phah thei. Hetianga tih pawha a liah fai/liah ro mai loh chuan puan fai, ro tha taka hruk hul vat tur a ni.
  6. A lai hrui chu a lai atanga 2.5 cm a hla-ah hrui hraw deuhva tawn tur a ni a, a tawnna hnuai pawnlam 1cm velah bakcheh/blade faia tan chhum tur a ni. A laihrui tan chhum hma hian zawitea zut fai a tha a. Tin, 7% Tincture Iodine Solution emaw, 2% Gention Violet tuia chiah tur. A awm loh chuan Dettol fir hman mai tur.
  7. Bawng note piang hlim mut hmunah chuan buhpawl 2 – 3 inches – a chhaha phah tur.
  8. Bawng note piang hlim chuan a pui hnute haw hmasa (eng deuh) ‘colostrum’ chu a hne tha tur a ni a. Bawng note pian atanga darkar 6/12 vel chhung chu a pui bulah colostrum hne tura dah tur a ni a. Bawng note rih zawng hmun ruka thena hmun khat (1/6) hu vel a hne tur a ni.
  9. Colostrum hi Bawng note ek nem nan te, Bawng note natna do letna (immunity) tihchak nan te a pawimawh hle a. Bawng notein hnute a hnek hnu darkar hnih velah a hlam ek a tla tur a ni a, a tlak lawk loh chuan butter milk 250 g leh tel (Mustard Oil) 100 g chawhpawlh intir tur a ni.
  10. Bawng note hi ni 4 – a upa a nih thlengin 1/10th body weight hnute pek tur a ni.
  11. Bawng note chu ni 10 vela upa a nih atangin chaw bantir tan tur a ni a, concentrate tha, protein tam deuhna chaw tha pek tan phawt a tha. Bawng note ni 30 – a upa a lo nih meuh chuan bawnghnute tel lo pawhin an lo khawsa thei tawh thin.
  12. Bawng note-in concentrate starter ration 0.45 g – 750 g nitin an ei theih hunah Bawng note chu lak hran (weaned) theih a ni. Bawng lian ho note hi chu 3 – 4 weeks velah lakhran a tha.

 

Bawng note pian atanga a pui hnute nghei tir an nih thleng hian uluk taka enkawl tur a ni a. Hemi hunlai hian natna do letna an nei tlem a, natna hrang hrang- kawthalo, awmna leh a dangte an kai hma hle. Anmahni tha taka enkawl bakah an awm dan a danglam em tih uluk taka chian fo tur a ni. Hemi hun chhunga hrisel tha tak leh than tha taka an awm chuan an puitlin thlengin an tha duh nge nge thin a, hrisello leh fere taka an awm erawh chuan an nih tur ang an phak lo hlen thei a ni. An awmna hmun, tui leh chaw leh a pekna hmanruate an thianghlim tur a ni. Chaw pek tlem lutuk tur a ni lova, pek tam lutuk tur a ni hek lo. Thil hrawmhraw lutuk pek rih loh tur a ni.

BAWNG LA ENKAWL DAN

            Bawng la tih hian bawng note a pui hnute nghei tir atanga note an neih hma chhung zawng a huam thei ang. Hemi chhung a enkawl that hi a pawimawh hle. A hun taka hur thei turin an hrisel tha tur a ni a, naupai turin an taksa pawh a lian tawk tur a ni bawk. Bawng la enkawl chungchang ah a hnuaia mite hi ngaih pawimawh tur a ni.

  • An thau chak lai a nih avangin chaw tha an mamawhna a sang a, hnimhnah ringawt atanga an mamawh tawk an hmuh phak loh avangin concentrate feed pek tel tur a ni.
  • A bik takin thla 6 chin hnuailam an nih laiin hnimhnah hrawmhraw ei leh pai tawih kawngah an chak lova. Tin, hnimhnah leh thil dang atangin hrik leh rulhut lamte an kai awlsam a. Hengte avang hian hnimhnah nem lam leh concentrate feed pe a duat an tul a. An taksa ah hrik an kai em tih pawh en sak fo thin a tha. An mamawh dan azirin hlo leh hrik tihremna damdawi pawh pek thin tur a ni.
  • |ha taka than an mamawh nasat hun lai anih avangin tui thianghlim leh damdawi pawh an mamawh anga pek thin tur a ni.
  • An upat dan leh an len dan mila khung khawm tur an ni a. Upat dan leh len zawng inang lo lutukte hmun khata khung loh tur a ni.
  • Bawng la te hian exercise an mamawh a, an kal kual velna tur siam sak theih nise a tha.
  • Kumkhat an nih atangin an hur leh hur loh uluk taka en fo tur a ni a. Kum 1½ an nih thlenga an hur loh chuan Doctor rawn tur a ni.

BAWNG HUR HRIAT DAN TLANGPUI

Bawngnu hi thla 10 vela upa (6 – 14 months) an nihin an hur tan thei a. Ni 21 danah an hur zel tura ngaih a ni. An hur (oestrus) chhung hi darkar 18 vel (12 – 24 hours) a ni a, a hurmu (ovary) atanga a chi chhuah hun chu a hur hnu darkar 11 (5 – 16 hours) vela ngaih a ni. Tin, a no pai hun chhung hi ni 281 vela ngaih a ni a, ni 7 velin a tlaiin a hma thei ve bawk.

            Bawngpui a lo hur chuan a hnuaia kan han tarlan ang hian a hriat theih a, Bawngpui thenkhatah a awm vek kher lo thei:-

  1. Chhan leh vang dang awm lovin an bu sek a.
  2. A serh atangin hnang fim tak a lo chhuak a.
  3. Dan pangngai lo takin an tang hru a, an awm hle hle thei lo.
  4. Tam vak lovin an zung sek a
  5. An ngum a han nemin an erin an meite a sir zawng deuhvin an kan ur ur a, an dawh tha duh hle
  6. An bul hnaia awm Bawng dangte bawh an tum ut ut thin.
  7. An chaw ei zat a tlem thut bawk thin.
  8. Hnute sawr lai chu an hnute a tla hniam thut bawk thin.
  9. An serh biang chhunglam keuvin a lo sen lar deuhva, an serh biang pawn a lian deuh thin.

BAWNG RAI ENKAWL DAN

  1. Bawng rai lai chu a rai tan thla 3 chhung leh a rai tawp lam (no neih hma) thla 3 chhung vel chu dimdawih zual a ngai.
  2. Thui tak tak kal tura kaih/khalh loh tur, kawng rualrem lova kal tir loh hram a tha.
  3. Ran dang nena insik/ insula pumpelh tur a ni a .
  4. Mihring leh Ui – ten tibuai a, an um phal loh tur a ni.
  5. Chaw pek that a pawimawh.
  6. Ran no chhiat tawh bulah awmtir loh hram hram tur.
  7. Rai hram no nei hnaite chu room hran no neihna hmun siam sakah dah hran a tha.

Note:   Bawngpui sawr laite hi an no neih atanga thla khatnaa rawn hur leh maite pawh sawi tur an awm a, a tam ber erawh chu thla 3 chhungin an hur ber. Bawngpui sawr lai note pai chu a no neih hma thla 2 vela hnute sawr chawlhsan a tha. Thla hnih awl zel a nih chuan kum khatah ni 305 vel sawr ni a awm dawn tihna a ni. Bawngpui a no neih leh thlenga sawr hi a tha lova, a hlawk lo zawk thin.

BAWNGPUI SAWR LAI ENKAWL DAN

            Bawngpui len zawng leh a hnute ngah dan azirin bawngpui sawrlai enkawl dan tur a inang lo thei. A tlangpuiin a hnuaia mite hi ngaih pawimawh tur a ni.

 

  1. A in tha: A in a tha tawk tur a ni. Ruah leh thli laka him lo, chhuat nghetlo leh tlakhawlh hlauhawm reng, in nghing dur dur thei a an awm hian bawng an nervous a, hnute an ngah duh lo. Bawng in chu fai taka enkawl tur a ni.
  2. Chaw pek: Bawngpui in hnute tha taka a pek chhuah theih nan chaw tha pek a ngai. An taksa in hnimhnah a mamawh a, hnimhnah ringawt erawhchu a tawk lo. Concentrate feed pek tel a ngai a, wheat vai ringawt erawh chu concentrate feed a tling zo lo. A tlangpuiin an chaw ei zawng zawng 60-70% hnimhnah niin 30-40% concentrate ni thei se a tha. Bawng chaw pek chungchangah pek khata pek tam ai chuan tlem deuh zawka pek zin a tha. Tin, pek apiangin hnimhnah leh concentrate a indawta pek a tha lehzual. Farm changkang zawkah ni khatah vawi li laite chaw an pe a, hei hian an pumpui chawl lovin a siam a, a tha hle a ni.

Bawngpui len zawng leh hnute pek tam zawng a in an loh avangin an chaw mamawh zat a inang vek lo. Concentrate pek tur zat chhut dan awlsam ‘Thumb Rule Feeding’ an tih mai chu hetiang hi a ni.

Hnimhnah tha tawk pek hian bawngpui tha pangngai chuan hnute 5 lts thleng a pe thei a. Hemi bak 2 lts a tam zelah concentrate 1 kg zel nikhatah pek tur a ni. Entirnan- Bawngpui ni khata 10 lts hnute pe chuan hnimhnah bakah 2.5 – 3 kgs concentrate a ei tur a ni.

 

 

NI KHATA BAWNG LIAN IN CHAW AN MAMAWH DAN TLANGPUI

Sl. No. Particulars Concentrate Hnim hring
1 Bawng lian rai lai 4 kgs 20-25 kgs
2 Bawng lian hnute sawr lai 4-8 kgs 20-24 kgs
3 Bawngpa tuai 2 kgs 10 kgs
4 Bawng la 2 kgs 15 kgs
5 Bawng pa chi thlahtu 4 kgs 10 kgs
6 Bawng note hnute nghei chin ½ kg 10   gs

 

  1. Tui pek: Bwng hian tui an mamwh tam em em a, bawngpui sawrlai phei chuan an mamawh tam leh zual. Tui hian an thil ei pai tawih kawngah nasa takin a tanpui a, hnute insiam nan leh an taksa peng hrang hrang hnathawh tha taka a kal theih nan a pawimawh em em bawk a ni.

Ran in ui an in tam deuh lai chu tlai hnute sawr zawh, ni tlak hma deuh vel te, chhun pachangah leh zing lam tuk thuan ei hun velah te a ni a. Bawngin tui an mamawh zat tlangpui lo tarlang ila-

 

Sl. No.   Nitin tui mamawh zat (litres)
Thlasik Nipui
1 Bawng note 11.8 28.4
2 Bawng la 17.5 55.3
3 Bawngpui 45.1 55.5
4 Bawngpui sawr lai 58.5 63.9
5 Bawngpa 45 50

 

            Bawngpui sawr lai tan tui 4.5 litres an taksa rih zawng 50 kgs zelah an mamawh a, bawnghnute litre khat zel atan tui 3 litres an mamawh belh bawk.

            Tui in tur thianghlim chhawp reng a harsa a nih chuan Bawng chaw pek hma darkar 1 ah leh chaw pek hnu darkar 2 vel tui chhawpna hun tha a ngaih a ni.

BAWNG NO NEIH HLIMA HARSATNA AWM THEI TE

 

  1. CHHIL (HLAM) TANG (RETENTION OF PLACENTA):

Bawng puiin no a hrin atanga darkar 4-5 vel chhungin a chhul a tla tlangpui a, darkar 12 hnuah pawh a la tla lo a nih chuan ‘chhul tang’ tih a ni thin. Mithiamte chuan bawngpui no hring za zel a 4-11 te hi an chhul a tang thin an ti.

Bawng chhul/hlam tang chungchang a hriat tur:

  • A chhul atanga uai chhuakah chuan thil rit lutuk khai loh tur a ni, hei hian hliam leh thi put vak a siam theih bakah chhul vung etc. a siam thei.
  • A chhul uai chhuak duah chu chhuat thleng, rah palh hlauhawma a awm chuan rah phak loh tawk a tan sak tur a ni. A serh chhunga lut daih khawpa tan erawh tih loh tur a ni.
  • Thiamna nei si lova a chhul tang tharum hmanga pawh chhuah ringawt tur a ni lo, a chhul a chhia-in a chin phah hlauh thei a ni.
  • A chhul tang lak chhuah hi a hma thei ang bera tih chu a tha a, darkar 12 aia tam a tang a nih tawh rau rau chuan darkar 48 ral hma chuan awlsam taka lak chhuah a theih vek lova, hmanhmawh lutuk lova, heti lampanga mithiam ruaia lak chhuah tur a ni.
  • Bawng chhul tang chu no a neih atanga thla 2 a ral hma chuan a hur a nih pawhin a chi pek loh/thlah tir loh tur a ni.
  • A chhul tang thin bawng chu no a neih hunah pawh a chhul a tang leh duh hle a, chuvangin no a neh zawh hlim te-ah 10ml Oxytocin or 2ml Clostenol a chiu tur a ni.
  1. CHHUL INNGHAK TAWLH CHHUAK ( Prolapse of Uterus) :

Bawngpi no nei thenkhat a no hrin hma or hrinchhuah hnu lawkah a chhul innghak pum pui emaw thenkhat emaw a rawn tawlh chhuak ve thin a, rang taka dah luh leh a nih loh phei chuan hliam, vung a awm duh hle a ni.

Hriat tur pawimawh:

  • A chhul innghak chhuak chu bawlh-hlawh kai lova silfai tur a ni a, a hliam loh nan polythene or plastic bag-a tuam / thun tur a ni.
  • Taksa lumna ang vela tui tih lumin chiah/tih huh thin tur a ni.
  • Bawngpui chu a ding a nih chuan a chhul innghak lo chhuak chu puan fai huh- a tuam chungin a serh zawnah chawikan tur a ni.
  • A chhul dah luh fel a nih hnu ah pawh chaw puar lutuk a ei tir tur a ni lova, a rei thei ang ber ding se a tha. Chaw tuiril leh pai tawih awl ni 3-4 chhung pek tur a ni.
  • A phing a chhuak tel ve a nih chuan a zun siak tur a ni a, a theih loh chuan a phing chu hriau G.No. 18 hmanga vit pawpin a zun paih chhuah tur a ni.
  1. MILK FEVER:

Milk fever hi bawngpui thisena calcium tlakchham avanga lo awm a ni a, bawng in no a neih dawn tepah leh a no neih hlim te-ah he natna hi bawngpui hian an vei duh bik a ni. Bawngpui no neih vawi 3-7 chhungin a awm tam bik a, bawngpui upa lamah a tam duh hrim hrim bawk. Tichuan bawng kum 6-10 hian Milk fever an vei duh zual bik.

A natna lan chhuah dan:

  • First stage: Bawngpui chu a lo za deuh chung a, a khur der der a, khawihin a phu hma em em a, a thatchhia a, a nguaiin chaw a ei tha lova, ding tha hlei thei lovin a pai a pai a, a tawp ah a tlu nge nge thin.
  • Second stage: Bawngpui chu a tho thei lova, a bawk tlat thin. A lu chu a nak nem ah dahin hnung lam a hawi tlat thin. A taksa chu a pangngai aiin a vawt zawk a, a marphu a chau va, a mit naute a lo zau-a, a hmui a hul phuk thin.
  • Third stage: Bawngpui chu a bawk peih tawh lova, a sir zawngin a mu thlawp thin, a chau em em a, a lungphu a zawiin a rang em em a, a pum a puar a, enkawlna dik tak pek vat loh chuan darkar 12 chhungin a thi mai thin.
  1. KETOSIS / ACETONAEMIA / HYPOGLYCEMIA:

Ketosis hi bawngpui no nei, no neih atanga thla khat chhungin a awm duh ber a, bawngpuiin glucose a tlakchham avanga lo awm a ni.

 

A lanchhuah dan: Chaw a ei tha duh lova, a tirah hnimhnah leh buhpawl ei duh siin wheat vai, oil cake etc. a ei duh lova, a hnute tui a lo tlem thut a, a cher tial tial thin. Khawsik a awm lova, marphu leh thaw te a pangngai a, a ek a khal a, thil hnangin a khuk bawk thin. A zun, hnute tui leh thaw-ah thil thlum rim a nam chek thin. A in liak vak vak a, a taksa a khur der der a, a vir sek a, a mit pawh a del thei hial thin.

Bawng no nei hlimin harsatna a tawhin hun rei tak nghak lovin Doctor koh tur a ni. Midangte tih dan hriat avanga mahni-in lo tih ve chiam chin loh a tha. A hun taka enkawl hian bawngpui ah chhiatna nasa zawk thleng lovin a awm theih a. Enkawlna tur dik tak an dawn loh erawh chuan chhiat hlenna a thlen thei a ni.

Source:

  • Training manual for Dairy Farmers, issued by Information Wing, A.H & Vety Department, Mizoram
  • Animal Husbandry, G.C Banerjee, Eight edition