KILA LAMTLUANG

 John Lalnunsanga

Faculty (SM), SPRC

SIRD & PR

Mizoram

 

THUHMA

State Institute of Rural Development & Panchayati Raj (SIRD & PR) Mizoram hmalaknain Ni 5 – 9 April, 2017 khan Mizoram chhunga Village Council thlanchhuah mi 21 te pualin Kerala Institute of Local Administration (KILA), Thrissur, Kerala-ah ‘Exposure Tour-cum-Training on Participatory Planning’ neih a ni a. Hetah hian Village Council President 16, Vice President 1, Secretary 2, Treasurer 1 leh Member 1 kalin, heng mite hi khaw hrang hrang 19 atanga thlan chhuahte an ni. Exposure Tour a kalte hi SIRD & PR (SPRC) Faculty member 3 ten an hruai a; tin, Office Assistant 1 a kal tel ve bawk a ni.

 

KILA CHANCHIN TAWI

Kerala Institute of Local Administration (KILA) hi mahnia ro inrel (autonomous) niin Kerala sawrkar tana thawk a ni a, tualchhung inenkawlna/ rorelna lam zirna hmunpui a ni. KILA hi Travancore-Cochin Literary, Scientific and Charitable Societies Act 1955 hnuaia register a ni a. Tin, Central University of Kerala pawhin July ni 14, 2014 atang khan Zirbingna Hmunpui (Research Centre) atan a lo pawm tawh nghe nghe a ni. India ram hmun hrang hrang atangin MLA te, sawrkar mi pawimawh tak takte leh tualchhung inrelbawlna lam khawihtute’n KILA-ah hian Training an nei mup mup reng bawk a ni.

 

INHMUHKHAWMNA HMASA

KILA a kal turte pualin Ni 4.4.2017 chawhnu dar 3-ah Conference Hall, SIRD & PR Office-ah inhmuhkhawmna hun pawimawh tak neih a ni a. Hemi hunah hian Pi Maria C.T Zuali, Director, SIRD & PR chuan KILA a kal turte hnenah an thil hriattur pawimawh tak tak hriattirna hun a hmang a, hetianga zin turte puala thil inhrilh hriatna hun tha tak hman a ni thei hi a lawmawmin kan hlawkpui tlang hle a ni. Ni 4 zanah hian khaw hrang hrang atanga lo kal VC te chu a tuka Lengpui Airport pan mai turin Residential Hostel, SIRD & PR, Durtlang Leitan-ah an riak a ni.

ZIN KAWNG KAN ZAWH |AN TA

Ni 5.4.2017, Nilaini a lo inher chhuak a, zingkarah khua a nuamlo deuh ruai mai a, ruah a tla deuh cherh cherh reng bawk a. Thlawhnaa kal tur kan nih avangin ruah han tla deuh sek chuan rilru a tinuam zan lo deuh. Mahse, phur takin tukthuan ei kham zing dar 8:30 velah SIRD & PR hmun atangin Office Bus in Lengpui Airport pan turin kan chhuak ta a, kan hlim khawp mai. Lengpui pana kan kalkawngah pawh kan zinna tur chanchin leh KILA lam hotute hnena thil kan zawh tur hrang hrangte sawihoin kan titi nak nak hlawm a, KILA lama thil zuk zir chu kan phur takzet a ni. Tichuan, tluang takin Lengpui Airport chu kan thleng thla ta a.

 

A hmasa berin Lengpui Airport Terminal chhunga kan luh hmain zin tur zawng zawngten a huhovin thla kan la hmasa te te a, nuam kan ti ngang mai. Chumi hnuah a chhungah lutin tluang takin kan bungruate kan dah lut a, keimahni pawh security engkim paltlangin kan thlawhna tur kan nghak ta ran mai a.

 

Zing lamah khua nuamlo deuh mahse, Guwahati kan panna tur SpiceJet thlawhna alo thlen chuan tlemin khua pawh a zia ta deuh. Tichuan, a hun takah Guwahati lam panin kan thlawk chhuak ta a, chawhnu dar 1:30 velah Guwahati Airport kan thleng a ni.  

 

Guwahati Airport-ah darkar 3 vel kan nghah hnuin Bengaluru Airport kan panna tur SpiceJet thlawhna kan nghak chhuak leh ta a. Bengaluru Airport kan tum dawn hnaih lam hian khua a nuamlo tih a hriat theih a, thlawhna pawh a insawi nasa khawp mai. Mahse, tluang takin zan dar 7:30 velah Bengaluru Airport kan thleng leh ta a ni. Bengaluru atang chuan zan dar 10:15 ah Indigo Airlines hmanga Cochin Airport pan tur kan ni a; mahse, kan thlawhna chu darkar 1 in tih tlai a ni a. Zan dar 11:30 dawnah Bengaluru Airport kan chhuahsan thei ta chauh a ni. Tichuan, tluang takin zing lam dar 1 dawnah Cochin Airport kan thleng ta. KILA lamin ruahmanna min lo siam sak angin Cochin Airport atangin AC Bus nuam takah chuangin zing lam dar 3 velah tluang takin KILA, Thrissur kan thleng ta a ni.

 

KAN THLENNA CHU

KILA Campus chhunga Guest House ah kan thleng a, Room pakhatah mi pahnih zelin thlentir kan ni. Room tinah hian AC awmin WIFI connection pek kan ni hlawm bawk. An Guest House a changtlung hle mai a; tukthuan, chawchhun leh zanriah pawh Guest House ah vek kan ei thin a ni. Min thlen tir dan leh ei leh in an buatsaih dan hmang chu 3 Star Hotel nen pawh danglamna a tam lo khawp ang. Kerala khaw lum em em ah pawh lum ti hman lovin AC hnuaiah tui takin kan mu thei thin a ni.

 

Ei leh in lam pawh kan dawng tha viau. Chutih rualin Mizoram lam nen kan ei leh in phung a inan loh avangin ei har ti deuh chu kan awm mai thei e; mahse, tumah ei leh in han sawisel kan awm miahlo leh tui ti taka kan ei thei zel maite kha a lawmawm khawp mai. |henkhat chu thlen tuk vel atang kha chuan mizo bai dik tak kan chak hlawm em em tawh mai niin a lang.

 

ZIRNA HUN |AN A NI TA

Ni khatna:

Sawi tak ang khan Ni.6.5.2016 zing dar 3 velah KILA kan thleng a, darkar 4 emaw vel kan mut hnuah tukthuan te ei felin kan intifai hlawm a. Tichuan, zing dar 9:30 ah Balwant Rai Mehta Hall, KILA hmunah programme kan tan ta a. Hemi hunah hian Dr. PP Balan, Director chuan Mizoram atanga VC leh SIRD & PR Staff kalte lawmna thu sawiin inhmel hriattirna hunte pawh neih a ni. Director, KILA in programme hawnna hun a hman zawhah thingpui kan in zawk a, chumi hnuah session tan nghal a ni.

 

A ni khatna hi Balwant Rai Mehta Hall, KILA hmunah classroom session neih a ni a. Hemi ni hian KILA a thawk zirtirtu leh mithiam tak tak ten zirtirna min pe a ni. |awng lamah tlema harsatna nei te kan awm avangin, Faculty member SIRD & PR lamin tawng an let bawk a. |awnglettu kan awm avangin tawng lama harsatna neite pawhin engmah harsatna nei lovin thil kan zir thei vek a ni. Tlaiah session zawh fel vek hnuah KILA lam tawhktu ten Gandhi Grama Swaraj Art Gallery min tlawh pui a, a hmuhnawmin hlawkthlak kan ti hle.

 

Ni hnihna:

Ni 7.5.2017 a lo inher chhuak a, tukthuan ei khamah kan han inti fai sang sang hlawm a. Zing dar 9:30 ah kan thlenna Guest House kawt atangin AC Bus nuam takin Pudukad Gram Panchayat tlawh turin kan chhuak a, darkar 1 dawn kan tlan hnuah Pudukad Gram Panchayat Office kan thleng ta a. Pudukad Gram Panchayat President Pi Ambili Sivrajan-i leh a thawhpuite hian min lo dawngsawng tha hle mai a, kan pual liau liauin inlawmna hun hlimawm takte an lo buatsaih a, coconut tui leh thingpui tui tak nen min lo dawngsawng a ni. Tihchuan, powerpoint presentation hmangin Pudukad Gram Panchayat chanchin leh hnathawh tlangpuite chu hriattir kan ni a, hlawk thlak kan ti takzet a ni.

 

Pudukad Gram Panchayat Office kan tlawh zawh hnuah Pudukad Gram Panchayat hmalakna pakhat  Naupang Rualbanlote enkawlna hmun kan tlawh zawk a. Heti lam kawnga Pudukad Gram Panchayat te hmalakna a ropui khawp mai. He hmun kan tlawh zawh hian chawchhun (lunch) tui tak kan ei a, chumi zawhah Chazhoor Gram Panchayat hnuaia Vantlang Rorel Inkhawm (Gram Sabha) chhim turin kan chhuak leh ta a ni.

 

Chazhoor Gram Panchayat Vantlang Rorel Inkhawmah tluang takin kan va tel a. An theih ang tawkin min lo lawm a, chutih rualin Malayalam (Kerala ram tawng) an hman avangin duh angin kan inbe pawh lutuk thei lo. Mahse, min hruaitu KILA Staff ten kan zawhna neih ang angte an sawifiah thin avangin kan duh ang chu kan zir chhuak tho a ni.

 

Chawhnu dar 3 dawnah Chazhoor Gram Panchayat Vantlang Rorel Inkhawm chu kan kalsan ta a, a piah lawka Chazhoor Gram Panchayat Office-ah kan daklut leh zawk a. Office pawh an lo nei ropui khawp mai, an changtlung em em a, computer leh internet facility nen staff mithiam tak takte nen hna an lo thawk suau suau mai han hmuh khan rualawh a na duh khawp mai. Tichuan, thlate kan lak fel hnuah kan chuanna Bus ah lutin, Thalikulam hmuna Sneha Theeram Beach ah va hawi khawthawng turin kan chhuak ta a. Tuipui/ tuifinriat la hmulote kan awm nawk bawk nen, kan phur tlang khawp mai. Sneha Theeram Beach ah hun engemaw chen kan va hman hnuin kan thlenna hmun pan turin kan let phei leh ta a. KILA Campus kan haw thlen hmain kalkawngah kan bazaar haw a, min hruaitu KILA Staff te ruahmannain chutah chuan darkar 1 vel bazaar nan hun kan hmang a. Mahni duh zawngte kan lei fel hnuin zan dar 8:30 pelh hretah KILA Campus kan thleng phei leh ta a ni.

 

Ni thumna:

Ni 8.4.2017 a lo inher chhuak a, zing dar 10:00 ah Balwant Rai Mehta Hall, KILA ah programme kan tan a, Classroom session 3 kan nei leh a ni. Tichuan, chawhnu lamah programme tawpna hun hman a ni a, hetah hian Dr. Peter M. Raj, Associate Professor KILA chuan programme kharna leh certificate semna hun a hmang a ni.

 

Programme hman zawh hnuah chawchhun (lunch) chu chawhnu dar 3 velah kan ei hman tawk chauh a. Mahse, tumah ning hmel pu leh riltam hmel pu pawh kan awm lo. Kan programme hman leh thil zirte kan hlawkpui takzet a ni. Tichuan, ni 8.4.2017 tlai dar 6 ah khamlo tak leh ngai tak chungin KILA Campus kan chhuahsan a, Cochin Airport lam kan pan phei leh ta a ni.

 

TLUANG TAKIN AIZAWL KAN THLENG LEH TA

Ni 8.4.2017 zan dar 11:50 ah Cochin Airport atangin Indigo Airlines in Bengaluru kan pan a, darkar 1 hnu velah Bengaluru Airport kan thleng. Tichuan kan bungruate tifelin SpiceJet thlawhnain Ni 9.4.2017 zing dar 5:50 velah Guwahati kan pan leh a, darkar 3 dawn kan thlawh hnuah zing lam dar 9 rik hma hretin Guwahati Airport kan thleng leh ta. Guwahati Airport ah darkar 5 vel kan hahchawlh hnuin SpiceJet thlawhna bawkin Lengpui Airport kan pan leh a, chawhnu lam dar 3 velah tluang takin Lengpui Airport kan thleng a ni. Chuta tangin SIRD & PR Office Bus in tluang takin Aizawl kan thleng chho leh ta a  ni.

 

KILA A|ANGA KAN THIL ZIR PAWIMAWH ZUALTE

(Heng ahnuaia mite hi Mizoram Team a VC ten an thawhkhawm a ni)

  • Kerala ah chuan sawrkar leh Gram Panchayat/ VC te inpawhna athain kawng engkimah an thawhhona a tha em em a ni.
  • Hmasawnna hna thawh dan tur ruahmanna siam kawngah Kerala hi an thiamin an sang em em a ni.
  • Eirukna do tak tak tur chuan rilru lam siam thatna neih hmasak a ngai.
  • Panchayati Raj System hi Mizoramah lo hmang dawn nita ila, kan rilru lam insiam that hmasak phawt a pawimawh ang.
  • Kerala ah chuan Gram Panchayat/ VC ten an ruahmanna siamte, an hnathawhte, an sum hmanna leh an sum dinhmun dik takte mipui hriat turin an tarlang/ puangzar/ pholang tha em em mai a. Hetiang hian Mizoramah pawh ti ve thei ila a duhawm khawp mai.
  • Vantlang Rorel Inkhawm (Gram Sabha) an neih dan kalhmang kha a tha kan ti hle. Mipui kalkhawmte Group ah an inthen a, Group khatah mi 5-8 vel zel awmin Group tinte chuan Agenda an chhawpchhuah chu ngun takin an sawiho a, a tawpah Group zawng zawng kalkhawm lehin Group an thil sawiho te khaikhawmna hun an nei leh a. Hetiang a an tih hian mitin te chu sawihonaah an tel vek tihna a ni a. An tih dan kalhmang hi a tha kan ti em em a ni.
  • Hnathawh tur a awm piangin, Gram Panchayat te chuan tender an tichhuak thin a, a tling leh thiamte chauh thlan an ni thin. Party induhsakna emaw thian tha chhung leh khat emaw induhsakna avanga hna inpek a awm ve lo. A tling leh thiamte chauh hna pek an ni.
  • Mizoram atangin MLA leh Journalist te hian KILA hi tlawh ve thei se a duhawm hle, an ni hian nasa zawkin kan rama tualchhung inrelbawlna tihchak kawngah hma an la thei dawn si a.
  • Kerala State Sawrkanin Gram Panchayat/ VC te Tax lak kawngah leh sum hman kawnga a ring ngam em em leh Gram Panchayat te rintlak taka an awm kha an entawntlak takzet a ni.
  • Kerala ah chuan hmeichhe dinhmun chawisan kawngah nasa taka hmalak a ni a, chu chuan rah tha tak a chhuah a ni tih hmuh theihin a lang.
  • Kerala State sawrkarin an ram tana hna a thawh tum dan zirtirna mumal tak nen chiang takin mipuite hnenah a hriattir, hei hi entawntlak kan ti hle.
  • Kerala a Panchayati Raj System hlawhtlinna bulpui ber chu ‘Ram inrelbawlna ngaihtuahtu (politician) ten duhna tak tak thinlung an nei a, chu an duhna tihthlawhtlin a nih theih nan sawrkar officer leh thawktu dangten an puibawmin an tawimawm tha em em a ni’.

 

TLIPNA

Exposure Tour a kal VC member te an felfai em em a; zuk leh hmuam kawngah tumah sawisel ngai an awm lo te, hnam dangte mit tikham zawnga tumah an awm lo te kha an fakawm em em a ni. KILA hmuna thil hrang hrang min zirtirtu pakhat, kan programme puala Course Coordinator ni bawkin,  “Hmun hrang hrang atanga KILA a training kal tawhte zingah Mizoram Team hi zirtirna ngaithla tha, hun vawng dik leh zawhna zawt tha ber in ni,” tia a sawi kha hriat a hrehawm loh khawp mai.  

 

Aw le, VC ten KILA Kerala kan tlawh theihna tura hmalatu ber Pi Maria C.T Zuali, Director, SIRD & PR Mizoram chungah lawmthu kan sawi a, sum tam tak senga KILA atanga kan thil zirte khan kan ramah rah tha tak chhuah ngei se tih hi thinlung takin kan duh a ni.