MCS Probationers, 2016 Batch te-n training zo

Mizoram Civil Service (MCS), 2016 batch te’n Rural Development Schemes hrang hrang te zirchianga 16.6.2016 – 1.7.2016 chhunga SIRD, Mizoram, Kolasib a “Training on Rural Development Schems for MCS Probationers, 2016 batch” chu 1.7.2016 chawhnu khan kharna hun hman niin, Pu C. Lalzahngoa, Superintendent of Police, Kolasib District chuan kharna hun hi hmanpuiin, Training zo te hnenah Certificate hlanna a nei a ni.

          Kharna inkhawm hi Pi Maria CT Zuali, Director, SIRD chuan kaihruaiin, MCS thar te’n tluang tak leh tha taka Training an zawh theih avangin lawmthu a sawi a.

           Khuallian Pu C. Lalzahngoa chuan MCS thar, SIRD-a tluang taka Training zo te chu a lawmpui thu sawiin, training an zawh hunah hna hrang hrang te an thawk chho zel ang a, chungah chuan Pu leh Pi tur te’n kan Office-ah rawn dah rawh u, an tih thin nih kan tum tur a ni, a ti a. Mahnia hlawh kan neih hian thenkhat chuan thil tha lo lam ah kan kal phah thin a, a pawi hle thin a ni, chutiang ang ni ve lo tur chuan a chah bawk.

          Hmun kilkhawr leh nuam lo zawkah pawh la awm thei in ni a, chutiang hunah chuan mahni insiamrem a, nuam ti lo chunga awm ai chuan mahni awmna apiang nuam ti thei tura inbuatsaih thin turin Kolasib District SP chuan a chah bawk.
Pu C. Lalzahngoa chuan kan senior-te hi keini aiin zirna leh thildangah an thiamlo zawk pawh a ni mai thei e, mahse tluklohna kan nei a, chu chu Experience-ah hian kan pha thei ngai dawn lo a ni. Chuvangin kan zahthiam a pawimawh a ni.

          Hna pawimawh tak tak inla chelh dawn a, chungah chuan eng sawrkar pawh hrawn ila Sawrkar Policy tihhlawhtlin hi kan hna a ni a, mahni ngaihdana kalpui ngawt loh tur a ni, khuallian chuan a ti bawk.

          Khuallian chuan Ram, khawtlang leh midangte tana malsawmna ni turin duhsakna a hlan bawk a ni.

        Training kharna inkhawmah hian Training Course Director Pu Khawlsiamthanga Khawlhring chuan Report pe in, Pu Lalrinawma Khiangte, SDC, Kolasib chuan Training-te aiawhin thu a sawi bawk a ni.