Mid-Career Training for Mizoram Civil Service Officers neih a ni

Ni 16.4.2018 khan State Institute of Rural Development & Panchayati Raj (SIRD&PR), Durtlang Leitan-ah Chawlhkar 2 chhung awh tur Mid-Career Training for Mizoram Civil Service Officers chu neih tan a ni. Training hawnna hi Pu Lalzirmawia Chhangte, Secretary, MPSC chuan Khuallian niin a hmanpui.

Hawnna inkhawm hi Pi Maria C.T Zuali, Director, SIRDPR chuan a kaihhruai a. Hetiang course harsa taka buatsaih anih chhan chu MCS zingah Senior leh Junior Administrative Grade ni mek, kaisanna atan training hi nei tura tihmawkmawh alo nih tak avang leh sorkarin ti ngei tura a tih tawh vang a ni a ti a.

Khuallian, Pu Lalzirmawia Chhangte, Secretary, MPSC chuan thu sawiin training neih hi hlawkpui miah lo nia kan inhriat pawh hian kan lo hlawkpui hle thin a, training hi compromise mai tur a ni lova, career khawih thil anih avangin an controlling office te pawhin an naute training tur hi an dang mai mai thin tur a ni lo a ti a. Training hnem apiang an chhawr nahawm a, a chhawrtu organisation pawhin a hlawkpui thin a ti bawk. Tunlaiah sorkar hnathawk leh mipui kan inngheng nasa lehzual tawh a, dik tak, tha tak leh theihtawka mahni hna theuh kan thawh hi a pawimawh lehzual a, chutiang tur chuan Civil Service Officers te chu an training fo a pawimawh a ni a ti bawk.

He training-ah hian trainees te chu class room teaching bakah practical field visit neihpui an ni a, sorkar hmalakna Programme hrang hrang an zir bakah Project planning, Management leh Monitoring lam thlurbing pui an ni ang a. Heng te hi University, Department Officers leh SIRD Faculty ten zirtirna an pe a ni.

Training hi ni 27.4.2018 zan khan khar a ni a. Mi 6 te’n tha takin an zo thei a ni.