Exposure Tour to Maharashtra neih a ni

State Institute of Rural Development &Panchayati Raj (SIRD&PR), Mizoram buatsaihin Rashtriya Gram Swaraj Abhiyan (RGSA) hnuaiah 15th – 20th January, 2018 chhung khan Block Development Officer (BDO) leh District Local Administration Officer (DLAO) te tan “Exposure Tour to Maharashtra” neih a ni a. He tour-ah hian BDO 14, DLAO 3 leh SIRD&PR Staff 4 an kal a ni.

Ni 16.1.2018 ah YASHADA (Yashwantrao Chavan Academy of Development Administration), Pune-ah Mizoram atanga kalte lawmna hun hman niin, Course Director Dr. R.V. Pole, Faculty, YASHADA, (tour-a kalte lo buaipui tura ruat) chuan kaihruaiin, Ajay Savrikar, Director, SIRD, YASHADA chuan Mizoram atanga tour neia kalte lawmna thu sawiin, inkawmhona hun hlawkthlak tak hman a ni a. Hemi hnu hian Ralegan Siddhi thingtlang khua tlawh turin YASHADA chhuahsan a ni.

Ralegan Siddhi-ah hian an hruaitu hlun Anna Hazare kaihhruaina hnuaiah hmasawnna hna nasa taka thawh a ni a. School pakhat, Class – X fail chauh an admit thinna hmun tlawh niin, he School-ah hian infiamna chi hrang hrang hmanrua dah niin, lehkha ringawt nilo, infiamna leh thiam thil hrang hrang zirtir an ni. He khua fakawm em em na chu sawrkar tanpuina tel lo va, an inpekna leh tanrualna avanga hmasawnna chi hrang hrang hmuh tur awm hi a ni.
Ni 17.1.2018 khan Dogargan khua tlawh leh niin, he khua hi khawkheng tuar nasa thin an ni a, tuiah harsatna nasa tak an tawk thin a, mahse tui dahkhawlna tha tak an neih tawh avangin thal lai pawhin tuiah harsatna an nei tawh lo a ni.

Gram Panchayat office-te chu a changtlung hle a, computer leh internet nen, an khua information pawimawh zawng zawng te chhinchhiahna fel tak neiin, bangahte an tar bawk a. Gram Panchayat office-a hmanrua tam zawk chu sawrkar tanpuina tel lo va, mipui tanrualna avanga an neih a nih thu an Sarpanch (VCP) chuan a sawi a ni.

Hemi hnu hian Hiware Bazaar tlawh leh niin, Popatrao Pawar kaihhruaina hnuaia hma an sawn zia an sawi uar hle a. An Gram Panchayat Office te, Museum te, Public Health Centre te leh an School te chu tunlai leh changkang taka thuam leh enkawl vek a ni a. An tui khawl dante pawh hun reilote chhung atan chauh ni lo, kum tam tak daih turin ruahmanna an siam bawk a ni. Kum 1995 khan BPL chhungkaw 200 vel an awm a, tunah chuan BPL an awm tawh lo a ni!


Hiware Bazaar atang hian Ralegan Siddhi-ah, Anna Hazare office-ah kal lehin a, inkawmhona hun tha tak neih a ni bawk.
Ni 18.1.2018 ah chuan YASHADA-ah hun hman niin, ‘Local Governance in Maharashtra’ leh ‘Sustainable Development’ tih thupui hmangin Sharad Borde, IAS leh Dr. Rahul Hiremath, Associate Professor, Symbiosis, Pune te hnen atangin thusawi ngaihthlak a ni a.

Hei bakah hian mahni tawnhriat atanga hmasawnna hna thawh kawnga hmasawnna tur nia hriat te sawiho in, hlawk taka hun hman a ni. Pradeep Garole, Director, CCTR, YASHADA chuan Ralegan Siddhi leh Hiware Bazaar te’n tui khawlna tha tak an buatsaih dan leh tuihna an humhalh dan te a sawi bawk a ni.

Ni 19.1.2018 ah Pune khawpuia hmun pawimawh hrang hrang te tlawh kualin hun hlimawm tak hman a ni a. Chawhnu lamah inthlahna leh Tour kharna inkhawm YASHADA-ah neih niin, ni 20.1.2018 khan tluang takin Mizoram an rawn thleng leh ta a ni.